Guillaume de Machaut
Qui des couleurs saroit a droit juger
Et dire la droite signefiance,
On deveroit le fin azur prisier
Dessus toutes, je n’en fais pas doubtance,
Car jaune, c’est fausseté,
Blanc est joie, vert est nouvelleté,
Vermel ardeur, noir deuil, mais ne doubte mie
Que fin azur loyauté signifie.
Si vueil amer l’azur et tenir chier
Et moy parer de li en remembrance
De loyauté qui ne saroit trichier,
Et li porter honneur et reverence
Car, en bonne verité,
Riens ne vaut chose ou il n’a verité
N’il n’est amans qui ne tesmongne et die
Que fin azur loyauté signefie.
Si l’amerai de fin cuer et entier
Et porteray sans nule difference
Car moult me puet valoir et avancier
Et donner pais, joie et bonne esperence,
Et mes amis qui bonté
Ha dessus tous, m’en sera tresbon gré,
Car il set bien entre amy et amie
Que fin azur loyauté signefie.